У выставачнай зале Лельчыцкай раённай бібліятэкі распачала работу фотавыстава «Сэрца Палескага краю»
26.10.2021На ёй прадстаўлены работы фотакарэспандэнта раённай газеты «Светлае жыццё» Канстанціна Кавалёва.
На здымках імгненні, якія аўтар прыкмеціў у паўсядзённым жыцці палешукоў і іх побыце. Шмат увагі ён таксама надае пейзажнай лірыцы. На фотаздымках можна пабачыць маляўнічыя краявіды Палесся, гульню сонейка, у тым ліку велічныя заходы. Не мінае аўтар і абрады Палесся ― «Чырачку» і «Купалле».
Гэта фотавыстава для Канстанціна Кавалёва дэбютная, а зрабіць яе натхніла прыгожае ў жыцці палешукоў.
Адным з першых наведвальнікаў стаў вучань 11-га класа Лельчыцкай сярэдняй школы № 2 Андрэй Лозка.
– Мне падабаюцца ўсе фотаздымкі. Кожны з іх прыгожы. Маляўнічая прырода нашага Палескага краю. Здаецца, што «Купалле» знята нібы на кінастужцы. Самы ўдалы фотарад – усярэдзіне, на ім усё такое святочнае і прыгожае, – падзяліўся юнак.