Неглюбскія рушнікі — гісторыка-культурная каштоўнасць Рэспублікі Беларусь

Рашэннем сяброў Рады падтрымана прапанова аб наданні статусу нематэрыяльнай гісторыка-культурнай каштоўнасці Рэспублікі Беларусь тэкстыльнай традыцыі аг. Неглюбка Веткаўскага раёна Гомельскай вобласці.

Унікальнасць неглюбскай мастацкай традыцыі стала шырока вядомай у 1970-я гады дзякуючы шэрагу буйных выстаў і культурных акцый. Выдатныя прыклады ўмельства неглюбскіх майстрых дэманстраваліся не толькі на выставах дэкаратыўна-прыкладнога мастацтва ў СССР, але ў Італіі, Германіі, Вялікабрытаніі, Японіі, Бельгіі, Францыі, Канадзе, ЗША. Неглюбскія рушнікі ўпрыгожваюць адну з залаў ААН.

Калектыў Неглюбскага сельскага цэнтра ткацтва з’яўляецца лаўрэатам спецыяльнай прэміі Прэзідэнта Рэспублікі Беларусь у галіне культуры і мастацтва 2014 года.

Падораны 26 красавіка 2016 года неглюбскімі майстрыхамі Прэзідэнту Рэспублікі Беларусь 30-метровы рушнік адзначаны Аляксандрам Рыгоравічам як «самы лепшы падарунак».

Цэнтрам аднаўлення тэкстыльнай традыцыі сёння з’яўляецца Неглюбскі сельскі цэнтр ткацтва. Узначальвае ўстанову Уладзімір Кавалёў, у ткацкай майстэрні працуюць народны майстар Рэспублікі Беларусь Людміла Кавалёва, Таццяна Суглоб, Алена Дзямчыхіна. Пры цэнтры дзейнічае ткацкая майстэрня, дзе займаюцца дзяці і падлеткі, клуб ткачых — выдатнае згуртаванне старэйшых носьбітаў, скарбніца ведаў пра мясцовае майстэрства. У цэнтры працуе крама па рэалізацыі сувенірнай прадукцыі і невялікі музейны пакой гісторыі мясцовага рамесніцтва.

Акрамя ткацтва ручнікоў, сурвэтак і іншай сувенірнай прадукцыі майстры-выкладчыкі засвойваюць выраб традыцыйнага строю — ткацтва панёў, сарочак, платкоў, намітак, выраб дзявочага галаўнога ўбору, разнастайных упрыгожанняў. Майстры і навучэнцы выкарыстоўваюць адноўленыя касцюмы ў практычнай дзейнасці.