Шчасце ў гарошыне

Сёлетняй вясной кіраўніцтва і агранамічная служба калектыўнага сельскагаспадарчага унітарнага прадпрыемства “Млынок” Ельскага раёна вырашылі ўпершыню вырошчваць новую для сваіх палеткаў культуру — гарох. Пры гэтым кіраваліся дзвюмя абставінамі: па-першае, атрымаць дадатковыя грашовыя паступленні ў бюджэт гаспадаркі, бо гарох можа даць пры належных адносінах да агратэхнікі яго вырошчвання да 50 працэнтаў рэнтабельнасці. А па-другое, з’яўляецца магчымасць загрузіць магутнасці Ельскага кансервавага завода перапрацоўкай зялёнага гарошку.
Зараз на палях гаспадаркі поўным ходам ідзе сяўба гароху. Як паведаміў яе кіраўнік А. У. Максіменка, гэтай культурай будзе засеяна 85 гектараў. Сяўбу вядуць так званым “расцягнутым” графікам, каб потым можна было і ўбіраць ураджай таксама на працягу некалькіх тыдняў. Тым самым на перапрацоўку будзе дастаўляцца ў Ельск на кансервавы завод самая якасная сыравіна.
Для вырошчвання спыніліся на гатунку гароху “Фуга”, які дасць, як мяркуецца, па 30 цэнтнераў адборнага зерня з гектара. Усяго ж у гаспадарцы плануюць вырасціць сёлета 240 тон зялёнага гароху.
Мікалай БЯЛЬКОВІЧ