1 верасня – дзень утварэння Брагінскага раёна

Землякоў шчыра павіншавалі старшыня раённага выканаўчага камітэта Аляксандр Кохан і старшыня раённага Савета дэпутатаў Аляксандр Калясан. Яны нагадалі, што Брагінскі раён быў утвораны ў 1924 годдзе ў выніку маштабнай рэарганізацыі народнай гаспадаркі. "Наш раён – гэта не проста кропка на карце рэспублікі, не месца жыхарства для нас. Гэта агульны дом, які аб’ядноўвае людзей розных лёсаў, пакаленняў у адно цэлае", – гаворыцца ў віншаванні.

Упершыню Брагін упамінаецца ў Іпацьеўскім летапісе ў 1147 годзе як адзін з буйных гарадоў Кіеўскага княства. Гэтая зямля дала свету трох Герояў Савецкага Саюза, акадэмікаў Міхаіла Паўлючэнку і Дзмітрыя Шыраканава, выдатнага мастака Гаўрылу Вашчанку, пісьменнікаў Рамана Сабаленку і Міколу Ракітнага, паэта Сяргея Палуяна.

Гісторыя Брагіншчыны авеяна баявой і працоўнай славай продкаў, якія змагаліся за свабоду і незалежнасць роднага краю, дабрабыт свайго народа. І сёння, нягледзячы на наступствы Чарнобыля, Брагіншчына развіваецца, рухаецца наперад. Галоўнае багацце гэтага непаўторнага куточка Беларусі – працавітыя, мудрыя, адданыя сваёй справе людзі, якія шчыра працуюць на сваёй зямлі і жадаюць ёй міру і спакою.