Спяшаюць і мясцовыя жыхары, і турысты на цэнтральны пляж, каб адкрыць купальны сезон, палюбавацца вольнаю плынню Дняпра і крыху падсмажыцца на жоўценькім пясочку.
На пляжы створаны ўмовы для купання з дзецьмі розных узростаў, выгараджаны адпаведныя загончыкі для малечы. І столькі яркіх эмоцый і пазітыву тут, што можна падпітацца добрым настроем на наступны працоўны дзень тым, хто яшчэ не ў водпуску.
Каля Алеі Герояў у цэнтры гарпасёлка заспела рабят са школьнага аздараўленчага лагера “Вясёлая краіна” з вёскі Сяўкі: прыехалі з педагогамі ў райцэнтр на экскурсію.
Як расказала начальнік лагера Наталля Грыгор’ева, ён дзейнічае з пачатку чэрвеня і сабраў дзятву з малазабяспечаных, няпоўных і іншых сацыяльна менш абароненых сем’яў.
— 21 чэрвеня завяршаецца першая змена нашага дзённага лагера. Паспелі з рабятамі пакупацца, пабылі на экскурсіі у райаддзеле МЧС, прагуляліся па гарадскім парку, наведалі спартыўную пляцоўку— зазначыла Наталля Рыгораўна. А хлопчыкі і дзяўчынкі спяшаліся навыперадкі падзяліцца сваімі ўражаннямі ад плавання ў Дняпры.
Школьныя аздараўленчыя лагеры дзейнічаюць у чэрвені і ў раённай гімназіі, СШ імя А. Казлова ў Лоеве і іншых населеных пунктах раёна.
На здымках: дзеці з аздараўленчага лагера Сяўкоўскага дзіцячага сада-базавай школы, лоеўскія школьнікі і гімназісты таксама хораша праводзяць вольны час
Фота аўтара і прадстаўлена раённым аддзелам адукацыі
Фота аўтара і прадстаўлена раённым аддзелам адукацыі