Караткевіч нарадзіўся ў Оршы, скончыў філфак Кіеўскага ўніверсітэта і пачынаў як паэт. Бадай, кожнаму вядомы яго раманы «Каласы пад сярпом тваім» і «Чорны замак Альшанскі», аповесць «Дзікае паляванне караля Стаха». Але не ўсе ведаюць, што ён напісаў некалькі п'ес і сцэнарыяў да кінафільмаў, перакладаў Байрана і Адама Міцкевіча і нават быў аўтарам опернага лібрэта.
На жаль, Уладзіміру Сямёнавічу было адпушчана вельмі мала — толькі 54 гады. Дзякуй лёсу за тое, што на Гомельшчыне знакаміты пісьменнік пакінуў яркі след. Ён часта наведваў сваіх родзічаў у Рагачове, жыў у іх па некалькі месяцаў на год. Менавіта ў доме свайго дзядзькі ў Рагачове ён напісаў «Ладдзю роспачы», «Чазенію», «Нельга забыць» і пачаў «Каласы пад сярпом тваім». Некаторыя даследчыкі сцвярджаюць, што Рагачоў меў для Караткевіча такое ж значэнне, як Болдзіна для Пушкіна.
Бадай, лепшай нашай удзячнасцю Уладзіміру Сямёнавічу, памяццю аб ім будзе звяртанне да яго твораў, напісаных вобразнай сакавітай мовай, якія бясконца кранаюць душу і сэрца, колькі б разоў іх не перачытваў.
