У вёсцы Новае Палессе Лельчыцкага раёна 15 лютага адзначылі свята Стрэчання. Людзі абышлі вёску з абразом Божай Маці і грамнічнымі свечкамі ў руках, з веснавымі песнямі і карагодамі, з упрыгожанай елачкай, просячы блаславіць гукаць вясну.
Асноўныя завадатаркі свята — удзельніцы народнага фальклорнага калектыву «Палескія напевы» мясцовага сельскага клуба, якія з’яўляюцца захавальніцамі мясцовага стылю выканання традыцыйных песень, уключанага ў Дзяржаўны спіс гісторыка-культурных каштоўнасцей Рэспублікі Беларусь.