Калісьці ў вёсцы Санюкі
быў што ні дом – Назарчукі,
І людзі з прозвішчам такім
Жывуць, напэўна, тут вякі»
быў што ні дом – Назарчукі,
І людзі з прозвішчам такім
Жывуць, напэўна, тут вякі»
(Людміла Глухатарэнка)
– З дзяцінства памятаю, што ў нас тут было шмат самых розных драўляных санак як для дзяцей, так і для дарослых, – прыводзіць суразмоўца адну з версій пра назву. – Наша вёска пачыналася з Рудні, называлася раней Санькова Рудня. Здавён валодалі ёй Лінкевічы (па шэрагу публікацый Лянкевічы – заўвага аўтара). Быў пабудаваны маёнтак, разбіты парк з алеямі. Там потым была школа.
З гісторыі вёскі
Санюкі ў 1809 годзе былі ў складзе Мазырскага павета Мінскай губерніі як сяло Санюкоў. Пазней – у складзе маёнтка Міхалка. У 1897 годзе была школа граматы, на дваранскай сядзібе працаваў вадзяны млын. Праз год пабудавалі новую школу. 15 вяскоўцаў займаліся бондарствам.
Людміла Глухатарэнка знаёміць з творчасцю мастака Мікалая Назарчука
Санюкі ў 1809 годзе былі ў складзе Мазырскага павета Мінскай губерніі як сяло Санюкоў. Пазней – у складзе маёнтка Міхалка. У 1897 годзе была школа граматы, на дваранскай сядзібе працаваў вадзяны млын. Праз год пабудавалі новую школу. 15 вяскоўцаў займаліся бондарствам.
У 1908 годзе Санюкі ўжо ў складзе Міхалкаўскай воласці Мазырскага павета. Па звестках Людмілы Глухатарэнкі, дваранка польскага паходжання Элаіза (ці Леакадзія) Лінкевіч, гаспадыня маёнтка, у рэвалюцыю збегла адсюль у Польшчу. Вярнулася ў 1918-м з немцамі, калі ўжо сяляне разрабавалі будынкі, пабудавалі сабе хаты, печы. Жорстка, разам з кайзераўцамі, патрабавала вярнуць усё забранае.
У 1929 годзе тут арганізавалі калгас «Энергія», мелася нават кузня. 18 жніўня 1941 года нямецка-фашысцкія захопнікі акупіравалі вёску. У 1943-м у баях за вызваленне Санюкоў загінулі 32 воіны Чырвонай арміі, 66 вяскоўцаў не вярнуліся з франтоў Вялікай Айчыннай вайны.
Ваколіцы роднай вёскі ўславіў на сваіх карцінах член Саюза мастакоў Беларусі Мікалай Назарчук. Цікавы факт яго біяграфіі: у студзені 1944-га адвучыўся на курсах размінёраў у Мазыры. Вясною ўжо ўдзельнічаў у абяскоджванні боепрыпасаў на роднай зямлі. Потым служыў у арміі, у артылерыйскім палку. У 1947-м узнагароджаны як былы размінёр медалём «За адвагу».
Жывапісец Назарчук удзельнічаў у выставах не толькі ў Беларусі, але і ў Расіі, Англіі, Польшчы, Францыі. У мінулым годзе памёр. У мастацкай галерэі Міхаіла Савіцкага ў Мінску прайшла мемарыяльная выстаўка карцін славутага мастака і педагога.
560 жыхароў было ў Санюках у 1959 годзе. Зараз тут пастаянна пражывае 88 чалавек, з іх шмат дачнікаў.
У гэтай палескай вёсцы цікава было пазнаёміцца з яе старэйшынамі. Даведаліся, што і такіх людзей ужо небагата, хаты многіх купілі дачнікі.
Дома і рэдзька саладзейшая!
У Марыі Ахрэмчык усё жыццё звязана з родным краем. 20 студзеня 2021 года жанчына стрэне сваё 88-годдзе. Марыя Міхайлаўна – маці-гераіня, працавала тэхнічкаю ў саўгаснай канторы, клубе, выгадавала 6 дзяцей, мае 14 унукаў, 12 праўнукаў. «Усе зімаваць завуць, усе ў мяне цудоўныя, клапоцяцца. Ды нікуды не хочацца са сваёй хаты!» – падзялілася з намі, як высветлілася, маці Людмілы Глухатарэнкі.
Марыя Ахрэмчык: «Цяпер я вось такія дыванкі пляту. Як без работы?»
Тут, на вуліцы Зарэчнай, мы слухалі пранізлівую споведзь Міхайлаўны пра ваеннае дзяцінства, страту родных людзей:
– Маміна цёця жыла ў Палаўках, кіламетры тры ад Санюкоў. Як паблізу тут ужо фронт ішоў, мама адвяла нас да яе. І сама з намі засталася. А дзядуля Іван Мацвеевіч з бабуляй Маланняй Данілаўнай, калі іх гналі ў Міхалкі, скіравалі ў лес, у куранях жылі. Вырашыў дзед прыйсці дамоў узяць якога харчу. Бабуля сказала, што аднаго не пусціць. Выйшлі з лесу, а немцы іх схапілі бы партызан. У крайняй хаце сабралі 18 чалавек, пастралялі. Нізашто людзі загінулі!
44 гады працоўнага стажу
Сустрэліся мы надвячоркам і з аднагодкам Марыі Ахрэмчык, ветэранам працы, былым трактарыстам, вадзіцелем Мікалаем Назарчуком. За выдатную работу шафёр Назарчук атрымаў у дарунак ад гаспадаркі грузавік ГАЗ-51, на якім багата папрацаваў і на заслужаным адпачынку, дапамагаў землякам. Ужо 11 гадоў, як ён страціў сваю гаспадыню, з якой пражылі ў згодзе 53 гады, выхавалі чацвёра дзяцей, пахавалі аднаго з сыноў. «Дачка Марыя – мой дарадца і памочнік ва ўсім!» – не без гонару сказаў дзядзька Мікалай.
Мікалай Назарчук: «Машына мая і зараз на хаду, учора суседу дапамагаў па гаспадарцы»
...З дзяцінства яму памятаецца, як праводзіў да скрыжавання вуліц бацьку і брата Мішу. Іх прызвалі на фронт. Брат доўга не вяртаўся, думалі, што дзесьці загінуў. А ён дайшоў да Берліна, быў паранены нямецкімі снайперамі. Пасля вайны ветэран жыў у Карэліі да 96-гадовага ўзросту.
– У 1952-м мяне ў армію прызвалі, – дзяліўся Мікалай Назарчук. – З Калінкавічаў ехалі з канца мая да 22 чэрвеня. Аж у горад Савецкая Гавань, там порт Ваніна. Праз непрацяглы час – на караблі даставілі на Камчатку, потым служыў на Курыльскіх астравах. Пісарам быў у каравульным узводзе. Свету пабачыў!
У 1966-м Мікалаю Аляксандравічу пашанцавала трапіць на перападрыхтоўку ў дэсантнікі: так што на Міншчыне давялося тройчы скокнуць з самалёта на парашуце.
– Страхоцце таке! – па-санюкоўску ўзгадаў наш суразмоўца.
Мы ж пажадалі пенсіянеру і ўсім яго землякам здароўя, як мага больш радасці, дабрыні, шчасця. Няхай новы год, сімвал якога Бык, дапаможа ўсім скінуць гэты каронавірус, сустрэцца са сваімі сямейнікамі, сябрамі, пагаманіць, пасвяткаваць. Нам падалося, што вяскоўцы-палешукі пакутуюць не менш ад той нязвыклай ізаляцыі, у якой апынуліся ў гэтую працяглую эпідэмію. Было радасна выслухаць жыццёвыя споведзі іх, наталіцца крышталёвай вадою ельскіх моўных крыніц.
Санюкоўскі слоўнік
Саматужкі – санкі
Пуляняты – кураняты
«Пуль-пуль-пуль» – так клікалі курэй
Разявеня – няўважлівы чалавек
Пшэйка – карова
Прышалепкаваты чалавек – крыху з галавой не сябруе
Шапутасікі – дробная бульба
Папорацца – управіцца па гаспадарцы