На базе абласнога цэнтра турызму і краязнаўства дзяцей і моладзі адкрыўся тыдзень ўстаноў дадатковай адукацыі

Як адзначыла намеснік дырэктара цэнтра Вольга Пісарэнка, мерапрыемствы, якія пройдуць з 2 па 9 верасня, накіраваны на азнаямленне наведвальнікаў з дзейнасцю ўстаноў дадатковай адукацыі і прыцягненне школьнікаў і вучнёўскай моладзі да заняткаў у гуртках турысцкай і краязнаўчай накіраванасці. Госці свята пазнаёміліся з работай творчых калектываў цэнтра. Яркія прэзентацыі, выставы турысцкай амуніцыі, фотавыставы “Лета ў тураб’ектыве”, “Здароўе – змоладу!”, “Ура, мы ідзём у паход!”, відэафільмы аб дзейнасці ўстановы  пакінулі ў наведвальнікаў самыя добрыя ўражанні. Рабяты прынялі ўдзел у цікавых конкурсах і віктарынах, турысцкіх гульнях і спаборніцтвах. Самыя юныя ўдзельнікі мерапрыемства разам са сваімі бацькамі вучыліся арыентаванню на мясцовасці, пераадоленню паласы перашкод, складанню заплечніка і ўстаноўцы палаткі. Акрамя таго, была арганізавана работа скаладрома, дзе самыя спрытныя і смелыя мелі магчымасць выпрабаваць сябе ў “заваяванні вяршыняў”. Для гасцей свята яго арганізатары падрыхтавалі сапраўдны сюрпрыз. Удзельнікі мерапрыемства “перамясціліся” ў эпоху караля Вітаўта, дзе ім давялося стаць сведкамі рыцарскіх баёў. Рабятам выпала магчымасць не толькі паназіраць за рыцарскім турнірам, але і пазнаёміцца з даспехамі і зброяй эпохі сярэднявечча. Пасля ўрачыстай часткі мерапрыемства яго ўдзельнікаў запрасілі на майстар-класы ад педагогаў дадатковай адукацыі. Кіраўнікі аб’яднанняў  па інтарэсах прэзентавалі дзейнасць спартыўных і краязнаўчых гурткоў “Пошукава-выратавальныя работы”, “Юныя ратавальнікі”, “Спартыўнае арыентаванне”, “Мой край”, “Юныя краязнаўцы” і іншых. Па словах Вольгі Пісарэнка, дні адкрытых дзвярэй, якія пройдуць на базе цэнтра, дадуць магчымасць школьнікам пазнаёміцца з выставамі работ, зместам тэматычных стэндаў аб паходах і экскурсіях, даведацца аб тым, як можна цікава і з карысцю праводзіць свой вольны час.