Землякі народнага пісьменніка Беларусі падрыхтавалі анлайн-канцэрт, прысвечаны песняру Палесся.
Удзельнік Вялікай Айчыннай вайны, Іван Паўлавіч Мележ ваяваў пад Уманню, Нікалаевам, Растовам-на-Доне, быў цяжка паранены, лячыўся ў шпіталі ў Тбілісі. Вялікая Айчынная перажыта ім была спаўна.
Мележ адным з першых у гісторыі беларускай літаратуры вывеў у сваім рамане «Мінскі напрамак» рэальную гістарычную асобу: камандарма Івана Чарняхоўскага. Пісьменнік грунтоўна працаваў над гэтым творам, перапрацоўваў яго, імкнучыся быць максімальна праўдзівым.
Аднак фаліянтам найвышэйшай пробы Івана Мележа стала трылогія «Палеская хроніка», у якую ўвайшлі тры раманы: «Людзі на балоце», «Подых навальніцы», «Завеі, снежань». Наш зямляк, народны пісьменнік Беларусі за гэты яркі, панарамны твор быў адзначаны Ленінскай прэміяй. Ён стварыў сапраўдны літаратурны помнік Палессю, прысвяціўшы яго «бацьку, маці, бацькоўскай зямлі».
На Хойнікшчыне свята ўшаноўваюць памяць класіка беларускай літаратуры. У аграгарадку Глінішча ў мінулым годзе шырока святкавалі 100-годдзе пісьменніка. Сёлета свае карэктывы ўнесла пандэмія. Аднак, як паведаміла пляменніца Івана Мележа, кіраўнік хойніцкага народнага аматарскага аб’яднання «Спадчына» Лілія Краўчанка, удзельнікі мастацкай самадзейнасці запісалі анлайн-канцэрт, прысвечаны дню нараджэння песняра Палесся, і выклалі яго ў сацыяльныя сеткі. Гучаць любімая Іванам Паўлавічам «Растуць вербы каля грэблі», вершы-прысвячэнні, і канешне, землякі танцуюць «Нарэчаньку».
