У Нацыянальнай бібліятэцы Беларусі адкрылася кніжная выстава "Украінская Касандра". На ёй можна азнаёміцца з багатай творчай спадчынай паэтэсы: поўнымі зборамі твораў, публіцыстыкай і пісьмамі, згадкамі сучаснікаў, літаратурна-біяграфічнымі партрэтамі. Як адзначыў на адкрыцці выставы генеральны дырэктар бібліятэкі Раман Матульскі, "Лесю Украінку заўсёды ведалі і любілі ў Беларусі, яе творы перакладалі многія вядомыя беларускія аўтары. У фондах нашай бібліятэкі налічваецца звыш 250 розных выданняў, звязаных з яе творчасцю” І на гэтай выставе прадстаўлены унікальныя кнігі, якія з’яўляюцца вялікай рэдкасцю ў свеце, напрыклад, экземпляры 1923-1924 гадоў”.
На выставе можна пабачыць каштоўнае выданне "Лариса Петрівна Косач-Квітка (Леся Українка): біографічні матеріали, спогади, іконографі" (2015), якое складаецца з арыгінальных тэкстаў аўтара, успамінаў, артыкулаў і фота. Вялікая частка кнігі – успаміны і пісьмы сястры Лесі Украінкі — Ісідоры Косач-Барысавай.
Прадстаўлена і музычная спадчына: копіі нотных запісаў песень на вершы Лесі, а таксама зборнік народных украінскіх песень, запісаных з яе голасу. У раздзеле “Іконаграфія” — невядомыя дакументы з прыватных архіваў.
Выстава падрыхтавана сумесна з пасольствам Украіны ў Беларусі і Беларускім грамадскім аб’яднаннем украінцаў “Ватра” .
Пазнаёміцца з выставай можна да 25 мая.
