Дырэктар Хракавіцкай школы Брагінскага раёна Андрэй Смалянчук выйшаў сустракаць журналістаў абласной газеты з прыветнай усмешкай на вуснах. Малады, энергічны, гаваркі, адразу пачаў расказваць: у калектыве 19 педагогаў, якія перадаюць веды 72 вучням. Сёлета выпускаюцца 7 адзінаццацікласнікаў і 8 дзевяцікласнікаў, а ў новым навучальным годзе ўпершыню сядуць за парты 10 вясковых рабят.
Дырэктар Хракавіцкай сярэдняй школы Андрэй Аляксандравіч Смалянчук сёлета выйшаў пераможцам абласнога тура рэспубліканскага фестывалю «Педагагічны дэбют»
Першая школа ў Хракавічах была адкрыта 160 гадоў назад і называлася земскім народным вучылішчам. Цяперашні будынак узведзены ў 1988 годзе. За паслячарнобыльскі час яго дах прыйшоў у заняпад, і якраз у гэтыя дні будаўнікі робяць новы: спрыяе сонечнае надвор’е.
Заўсёды цікавыя ўрокі фізікі настаўніка Міхаіла Ерасавіча Казачэнкі
Раман Чэчка і Арцём Галка на ўроку фізікі
Музей «Іванава сядзіба» заўсёды рады гасцям. «Гаспадыня» сядзібы Ларыса Іванаўна Ткачэнка. Фрагменты экспазіцыі музея
Андрэй Аляксандравіч правёў па школьных кабінетах, паказаў гульнявы пакой, які абсталяваны дзякуючы мясцовай прадпрымальніцы Алене Малочка, і запрасіў у гісторыка-этнаграфічны музей «Іванава сядзіба». Рухаемся туды.
Два гады назад настаўніца пачатковых класаў Ларыса Іванаўна Ткачэнка вырашыла не выкідваць рэчы з дому памерлых бацькоў, а захаваць усё як ёсць і ператварыць сямейнае гняздо ў музей. Так «Іванава сядзіба» стала данінай удзячнасці роднай хаце, у якой нарадзілася, і памяці маці і бацькі – людзей ад зямлі, простых сялянскіх працаўнікоў. Па вялікаму рахунку, гэта падарожжа ў жыццё і побыт нашых продкаў, у свет дзяцінства, у пачатак пачаткаў, туды, дзе закапана пупавіна і адкуль пачыналася дарога ў вялікі свет.
Тут ёсць кросны і дзіцячая люлька, бацькоўскі кажух і вышытыя мацярынскімі рукамі навалачкі, на якіх раскінуліся цудоўныя райскія кветкі. Адзін са стэндаў прысвечаны мясцоваму калгасу і яго людзям.
Гісторыя краіны пачынаецца тут, у роднай вёсцы, у роднай школе і «Іванавай сядзібе».
