Бойка, рубель, гладыш — наўрад сёння многім зразумелыя гэтыя словы. А вось нашым прадзедам і прабабкам яны былі знаёмы, таму што азначалі ўсяго прадметы быту, якія можна было ўбачыць ў кожнай сялянскай хаце. Выходзіць, гэтае незразумелае — на самой справе роднае, частка нашай гісторыі і нацыянальнай культуры.
Менавіта нацыянальная культура стала крыніцай натхнення для калектыву выдавецкага дома «Гомельская праўда». Вынік — каляндар, не проста стыльны и функцыянальны, а вельмі пазнавальны і сапраўды прыгожы. На кожным яго развароце, прысвечаным аднаму месяцу, — яркі фотаздымак чалавека ў народным адзенні і з прадметам хатняга ўжытку, аб якім можна прачытаць кароткую даведку на рускай і беларускай мовах. Аўтар здымкаў — Алег Белавусаў.
Не ўпершыню «Гомельская праўда» звяртаецца да нацыянальных традыцый: да 2015 года быў выдадзены настольны перакідны каляндар на беларускай мове, прысвечаны народным святам і абрадам: Купаллю, Сёмусе, Ваджэнню і пахаванню стралы.
Думаецца, у 2016 годзе, які названы Годам культуры, каляндар, прысвечаны прадметам хатняга ўжытку нашых продкаў і іх штодзённаму жыццю, можа стаць упрыгожаннем рабочага стала і цудоўным падарункам не толькі для беларусаў.
Набыць каляндар можна ў рэдакцыі газеты «Гомельская праўда» за наяўны і безнаяўны разлік. Падрабязную інфармацыю можна атрымаць па тэлефоне ў Гомелі 8 (0232) 71-71-64.
