Па тэмпах уборкі наперадзе гамяльчане

Гэта было адзначана ў ходзе рэспубліканскай селектарнай нарады па пытаннях сельскай гаспадаркі, якую пазаўчора правёў Прэзідэнт Рэспублікі Беларусь Аляксандр Лукашэнка.
Аляксандр Рыгоравіч адзначыў, што сёлета, мабыць за ўсю гісторыю краіны, вырашчаны самы высокі ўраджай збожжавых і зернебабовых культур. Ёсць магчымасць валавы збор хлеба давесці да 6,5 — 7 мільёнаў тон. Але ў народзе нездарма кажуць: не той хлеб, які ў полі, а той, што ў засеках. Таму найпершая задача — правесці жніво ў самыя сціслыя тэрміны і без страт, сабраць з поля вырашчанае з такімі цяжкасцямі збожжа да адзінага зярнятка. Умовы для ўборкі сёлета вельмі складаныя, сказаў далей Прэзідэнт, год хлебны, а месяц не хлебны. У выніку запозненай вясны сёлета ў параўнанні з папярэднімі гадамі і жнiво вядзецца на два тыдні пазней. Да таго ж і зараз надвор’е няўстойлівае. Па рэспубліцы зачасцілі дажджы. Таму на месцах трэба усе магчымыя сілы накiраваць на ўборку збожжавых і зернебабовых культур, своечасовую дасушку і дапрацоўку збожжа. Дапускаецца абмалот хлеба i вільготнасцю 20 працэнтаў. Работа ў полі павінна быць арганізавана з 10 гадзін раніцы (а там, дзе магчыма, і раней) і весціся да 10 гадзін вечара. Трэба да мінімуму скараціць магчымыя прастоі тэхнікі, а калі з’яўляюцца непрадбачаныя паломкі — рамонт весці прама ў полі.
Аляксандр Рыгоравіч звярнуў увагу і на той факт, што важным пытаннем на сёння застаецца нарыхтоўка хлеба дзяржаве. Асаблівая ўвага ва ўсіх абласцях павінна быць нададзена ўборцы і рэалізацыі на піўзаводы піваварнага ячменю з тым разлікам, каб не купляць яго за межамі рэспублікі.
Трэба таксама хутка завяршыць уборку азімага рапсу, актывізаваць работы па церабленню льну, корманарыхтоўцы і іншыя. Прэзідэнт даручыў ураду рэспублікі, адпаведным ведамасным установам, у тым ліку і банкам, забяспечваць фінансавыя патрэбы вяскоўцаў, выдзяляць неабходную колькасць гаруча-змазачных матэрыялаў, і ў першую чаргу саляркі, для збожжавых камбайнаў. Прэзідэнт запатрабаваў ад кіраўнікоў абласцей, раёнаў і сельгаспрадпрыемстваў рабіць стаўку на камбайны айчыннай вытворчасці. І толькі для тых гаспадарак, у якіх ураджайнасць перавышае 50 цэнтнераў збожжа з гектара, можна закупляць асобныя віды замежнай тэхнікі.
Па сутнасці разглядаемых пытанняў трымалі справаздачу на нарадзе прадстаўнікі ўраду, кіраўнікі рэспубліканскіх устаноў і аблвыканкамаў.
Дакладна і пераканаўча дакладваў Прэзідэнту аб стане спраў у аграпрамысловым сектары нашай вобласці старшыня аблвыканкама А. С. Якабсон.
— У нас пастаянна задзейнічана ў рабоце больш чым 90 працэнтаў камбайнаў ад наяўных, — паведаміў Аляксандр Серафімавіч. — Кожны дзень прырост да ўборачнай плошчы складае шэсць працэнтаў, а ў асобныя дні і больш. А ўсяго на сёння ўбрана ўжо 25 працэнтаў да плана.
Як выявілася ў ходзе дакладаў іншых губернатараў, у гамяльчан самыя высокія тэмпы ўборкі, нават вышэйшыя, чым у суседзяў з Брэсцкай вобласці.
Прэзідэнта зацікавіла, ці выконваюцца яго патрабаванні па выдзяленню дызельнага паліва для сельгаспрадпрыемстваў па льготных цэнах. І тут усё ў парадку. Калі кошт кілаграма дызпаліва на аўтазапраўках Гомеля і вобласці складае 1312 рублёў, то для вяскоўцаў яно прадаецца па 980 рублёў.
А. С. Якабсон паведаміў і аб тым, што паспяхова вядуцца жніво і рэалізацыя піваварнага ячменю. Дарэчы, у параўнанні з мінулым годам яго ўра-
джайнасць узрасла на 10 цэнтнераў і склала 34 цэнтнеры з гектара. Тое ж можна сказаць і пра азімы рапс. Але ў Віцебску на адпаведным прадпрыемстве пры яго прыёме прыдзірліва адносяцца да якасці пастаўляемай прадукцыі. Прэзідэнт патрабаваў тут жа навесці парадак.
Аляксандр Серафімавіч расказаў таксама аб тым, што нарыхтавана ўжо з разліку на ўмоўную галаву жывёлы 10,5 цэнтнера кармавых адзінак. Нягле-дзячы на шэраг іншых неадкладных работ у вобласці працягваецца корманарыхтоўка.
Штодзённы прырост на ўмоўную галаву жывёлы складае 0,1 цэнтнера кармавой адзінкі. І гэта адзін з лепшых паказчыкаў у рэспубліцы.
Пацікавіўся Прэзідэнт у нашага губернатара, як у вобласці ажыццяўляецца праграма па вырошчванню цыбулі і зялёнага гарошку. Аляксандр Серафімавіч паведаміў, што сёлета валавы збор цыбулі складзе 15 тысяч тон, а ўжо ў наступным годзе бу-дзе даведзены да 25 тысяч. Магчымасці і рэзервы для гэтага ёсць. Яны спаўна выкарыстоўваюцца.
Будуць выкананы заданні па вырошчванню і перапрацоўцы зялёнага гарошку. Кіраўнік дзяржавы ў цэлым адобрыў работу аграпрамысловага сектара вобласці. Гомельшчына, бадай, адзіны рэгіён, да якога ў ходзе селектарнай нарады не выказвалася прэтэнзій да арганізацыі сельскагаспадарчых работ і іх вынікаў.
Кіраўнік дзяржавы выклікаў на сувязь генеральнага дырэктара “Гомсельмаша” В. А. Жмайліка і пацікавіўся вытворчасцю камбайнаў “КЗР-10” і “КЗС-7”, а таксама работай завадчан па стварэнню новай, больш эфектыўнай тэхнікі.
— На 1 жніўня было выпушчана 611 айчынных камбайнаў, а да 15 чысла іх колькасць давядзём да 700, — адрапартаваў Валерый Аляксеевіч. — Усяго сёлета прадпрыемства паставіць вяскоўцам больш за тысячу збожжавых камбайнаў.
В. А. Жмайлік таксама паведаміў, што зараз завод працуе над стварэннем новых узораў не толькі збожжавых, а і іншых камбайнаў. У Карэліцкім раёне, напрыклад, праходзіць выпрабаванні і новы льнокамбайн вытворчасці “Гомсельмаша”. У бліжэйшыя дні яшчэ чатыры такія камбайны будуць у эксперыментальным парадку выпрабоўвацца на палях рэспублікі, у тым ліку і ў нашай вобласці. Прэзідэнт паабяцаў сельмашаўцам аказваць усебаковую падтрымку і фінансавую дапамогу. Выказаў пажаданне паскорыць работы, звярнуць асаблівую ўвагу на якасць вырабляемай тэхнікі і на фарміраванне даступных для вяскоўцаў цэн.
У заключэнне Прэзідэнт звярнуўся з патрабаваннем і просьбай да ўсіх удзельнікаў жніва забяспечыць высокапрадукцыйнасць уборачнага канвеера, паставіць заслон стратам і завяршыць уборачныя работы да 25 жніўня.
Сцяпан БАЛОТКІН