Добры старт

На чарговай абласной селектарнай нарадзе па пытаннях сельскай гаспадаркі, якую вёў старшыня аблвыканкама А. С. Якабсон, асноўная ўвага была сканцэнтравана на тым, як выконваюцца
прагнозныя паказчыкі па вытворчасці сельскагаспадарчай прадукцыі.
Сцяпан БАЛОТКІН

— А яны сёлета напружаныя, — напомніў Аляксандр Серафімавіч, — вытворчасць прадукцыі павінна скласці да ўзроўню мінулага года 110 працэнтаў, у тым ліку 120 працэнтаў у грамадскім сектары эканомікі. У цэлым старт узяты добры. Пераважная большасць раёнаў нават перавыконвае павышаныя заданні.
Словы губернатара ў ходзе сваіх справаздач пацвердзілі і кіраўнікі раёнаў. Напрыклад, старшыня Буда-Кашалёўскага райвыканкама М. І. Чарныш адзначыў, што ў цэлым прагнозныя паказчыкі за першы квартал да леташняга ўзроўню будуць выкананы на 120 працэнтаў, у тым ліку ў грамадскім сектары — на 130 працэнтаў. Аб тым, што значна перавыконваюцца заданні, гаварылі таксама старшыні Гомельскага і Ельскага райвыканкамаў У. С. Маёраў і С. М. Канопліч. Дарэчы, на дзень правядзення нарады ў Ельскім раёне поўнасцю была выплачана заработная плата. Тут паспяхова працуюць па ўсіх іншых напрамках сельскагаспадарчай дзейнасці.
На нарадзе было адзначана, што пасля змены кіраўнікоў прыкметна паляпшаюцца справы ў сельскагаспадарчай галіне Петрыкаўскага і Рагачоў-
скага раёнаў. У той жа час нельга не адзначыць, што ніжэй сваіх магчымасцей працуюць хлебаробы ў Веткаўскім, Акцябрскім, Чачэрскім і некаторых іншых раёнах.
— Недаравальна, што ў Чачэрскім раёне прагнозныя паказчыкі не выконваюцца нават у грамадскім сектары, — зазначыў на нарадзе першы намеснік старшыні аблвыканкама Г. В. Дашкевіч. — Трэба значна прыбавіць у рабоце сельскагаспадарчай галіны, асабліва ў грамадскай жывёлагадоўлі.
Георгій Віктаравіч таксама звярнуў увагу ўдзельнікаў нарады на актывізацыю работ па падрыхтоўцы да веснавой сяўбы, дзе яшчэ шмат вузкіх месцаў, своечасовую выплату заработнай платы і разлікаў за энерганосьбіты.
— У раёнах з найбольш відавочнымі ўпушчэннямі ў бліжэйшы час пабываюць нашы спецыялісты і дапамогуць паправіць становішча, — запэўніў старшыня аблсельгасхарчу Л. М. Апанасюк.
Намеснік старшыні аблвыканкама
У. Р. Надтачаеў ахарактарызаваў сітуацыю па будаўніцтву жылых домікаў для вяскоўцаў. У гэтай галіне, хаця і праглядваюцца поспехі, аднак ёсць і ўпушчэнні. Не выходзяць, напрыклад, на планавыя заданні ў Брагінскім, Веткаўскім, Акцябрскім, некаторых іншых раёнах. Горш таго, не ўсюды падрыхтавана праектна-каштарысная дакументацыя. Да першага мая гэтыя пытанні абавязкова павінны быць вырашаны.
На селектарнай нарадзе таксама абмяркоўваліся пытанні ажыццяўлення Дзяржаўнай праграмы па адраджэнню і развіццю вёскі.