Аграгарадкі выходзяць на старт

Развіццю сельскагаспадарчай галіны нададзены ў нашай краіне прыярытэт. На гэта звернута асаблівая ўвага кіраўніцтва краіны і мясцовых органаў улады. У сакавіку бягучага года прынята Дзяржаўная праграма адраджэння і развіцця вескi на 2005 — 2010 гады. Аб тым, як яна ажыццяўляецца на Гомельшчыне, расказаў прадстаўнікам сродкаў масавай інфармацыі ў ходзе прэс-канферэнцыі першы намеснік старшыні аблвыканкама Г. В. Дашкевіч.
Новы праграмны дакумент накіраваны на вывад аграрнай галіны на больш высокі ўзровень развіцця, рашэнне шматпланавых сацыяльных праблем вёскі, карэннае паляпшэнне матэрыяльнага дабрабыту сельскага насельніцтва. Адным з напрамкаў вырашэння гэтай праграмы з’яўляецца стварэнне аграгарадкоў.
— Згодна з Дзяржаўнай праграмай адраджэння вёскі на Гомельшчыне на працягу пяці гадоў будзе арганізавана 238 аграгарадкоў, у тым ліку ўжо сёлета 42, — паведаміў Георгій Віктаравіч. — Асновай іх з’яўляюцца буйныя населеныя пункты, дзе размешчаны адміністрацыйныя цэнтры сельгаспрадпрыемстваў і сельскія Саветы і дзе найбольш развіта сацыяльна-бытавая сфера. Стварэнне аграгарадкоў і прадугледжвае набліжэнне умоў жыцця сельскага жыхара да гарадскога. Але для гэтага трэба многае зрабіць. Толькі на развіццё аграгарадкоў, уключаючы будаўніцтва, рэканструкцыю і ўзнаўленне аб’ектаў сацыяльна-культурнай, камунальнай, інжынерна-транспартнай інфраструктуры, у бягучым годзе з усіх крыніц фінансавання выдзяляецца 90 — 100 мільярдаў рублёў.
Сёлета дарожнікам трэба асвоіць 13 мільярдаў рублёў капіталаўкладанняў. Работнікі бытавога абслугоўвання ўзяліся за наладжванне і арганізацыю комплексных прыёмных пунктаў. Дзесяць неабходна пабудаваць новых. Бытавікам патрэбна дабіцца, каб сёлета запрацавалі 42 комплексныя прыёмныя пункты, а да канца 2010 года — 238.
Вядзецца рэканструкцыя і расшырэнне ўстаноў медыцыны, культуры, гандлю. Прадумваюцца пытанні забеспячэння ўсіх галін кваліфікаванымі кадрамі. Дарэчы, з арганізацыяй аграгарадкоў з’явяцца сотні, калі не тысячы новых рабочых месц.
У журналістаў узнікла пытанне: а ці не прывядзе гэта да таго, што гаспадаркі, якія не ўваходзяць у праграму, могуць аказацца ў баку ад гэтага развіцця?
— Па-першае, аграгарадкі арганізоўваюцца на тэрыторыі вобласці так, што ад іх да кожнага населенага пункта, нават невялікага, не больш дзесяці кіламетраў, таму паслугі будуць даступныя большасці сельскіх жыхароў, — растлумачыў Г. В. Дашкевіч. — Па-другое, праграма адраджэння сяла прадугледжвае развіццё сацыяльнай і вытворчай сферы не толькі ў аграгарадках, а і развіццё вескі ў цэлым. Многае робіцца па паляпшэнню іншых напрамкаў дзейнасці аграпрамысловага комплексу. Працягваецца жыллёвае будаўніцтва з улікам узвядзення ў год пяці новых домікаў у кожнай гаспадарцы, што дасць прыток маладых спецыялістаў у вобласць.
Гаворачы аб мерах па павышэнню матэрыяльнага становішча сельскіх працаўнікоў, Г. В. Дашкевіч адзначыў: зарплата на працягу апошніх трох гадоў павышаецца. Але пакуль яна застаецца нізкай. Бяда не ў тым, што мала плацім, а ў тым, што мала зарабляем. Вось таму зараз і стаіць задача паўсюдна ўкараняць у вытворчасць метады навукі і перадавога вопыту, найноўшыя інтэнсіўныя тэхналогіі з тым разлікам, каб пры меншых затратах атрымаць больш прадукцыі, пераходзіць на прыбытковыя метады гаспадарання.
Колькасць стратных гаспадарак у апошні час зменшылася да мінімуму. Калі на 1 студзеня мінулага года было 240 такіх гаспадарак, то на такую ж дату сёлета іх стала менш 20, а праз год не павінна быць увогуле. Аказанне матэрыяльнай і фінансавай дапамогі сельскагаспадарчай галіне ў спалучэнні з іншымі арганізацыйна-эканамічнымі мерамі згодна з папярэднімі падлікамі дазволіць за сёлетнія паўгода ў параўнанні з аналагічным леташнім перыядам павялічыць валавую вытворчасць прадукцыі прыкладна на 40 працэнтаў. У цэлым за год чакаецца далейшае павышэнне росту аб’ёмаў выхаду сельскагаспадарчай прадукцыі.
Сцяпан БАЛОТКІН