Кiшка

Бульбяная кішка з'явілася ў нацыянальнай кухні ў ХІХ стагоддзі з распаўсюджаннем бульбы, якую ў Беларусі называюць "другім хлебам".

Прататыпам кішкі з бульбы была яшчэ больш старадаўняя страва – каўбаса з крыві і грэчневай крупы ў свіной кішцы (кішка, крывяная кішка). Дарэчы, паводле легенды, прозвішча ўплывовага магнацкага роду Кішак паходзіла ад таго, што заснавальнік дынастыі вельмі любіў такую каўбасу. Ёсць таксама рэцэпты кішкі без крыві, з варанай свінінай.

Каўбаса з цёртай бульбы і свініны (сала і/або мяса) палюбілася беларусам як вельмі смачная, даступная і сытная страва. А яшчэ кiшку часта гатавалi на зiмовыя святкi-калядкi.

Для прыгатавання 4 порцый:

200 г свініны
1 буйная цыбуліна
50 см свіной кішкі
1,6 кг бульбы
50 г мукі
соль і перац па смаку
50 г расліннага алею

Для соуса:

100 г смятаны
1 невялікі зубчык часныку
2 галінкі зялёнага кропу

Бульбу і цыбулю нацерці на тарцы, мяса нарэзаць сярэднім кубікам. Інгрэдыенты змяшаць, дадаўшы муку, соль і перац. Кішка фармуецца даволі хутка і проста. Пры запаўненні трэба сачыць, каб каўбаса атрымлівалася раўнамернай па таўшчыні – без пустот. Каўбасу выкласці на змазаную алеем патэльню і запекчы ў духоўцы да гатоўнасці пры 160 ºС – ад 30 мінут да гадзіны ў залежнасці ад аб'ёму стравы.

Для прыгатавання соусу ў смятану дадаць часнык, здробнены кроп, круху солі і цукру. Гатовую бульбяную каўбасу нарэзаць, выкласці на талерку, упрыгожыць памідорамі і зелянінай.

Асобна падаць соус.