У кожнага на планеце ёсць любімая мова, для мяне – гэта беларуская. Больш за ўсё яна цягне сваёй мілагучнасцю і жывасцю! Нездарма амаль што кожны мастак слова айчыннай літаратуры звяртаецца да гэтай тэмы ў сваіх творах.
У свеце існуе каля 7000 моў. Па дадзеных ЮНЕСКА, кожны месяц свет пазбаўляецца дзвюх. Каб дзеці не саромеліся роднага слова, мы з настаўніцай беларускай мовы і літаратуры Алай Пратасенка вырашылі правесці ў школе невялікае мерапрыемства для вучняў 4–7 класаў. Яно прайшло ў фармаце дыялогу, які ўключаў цікавыя звесткі аб мовах свету, інтэрактыўныя гульні і рэфлексіі. Падчас таго, як я паказвала прэзентацыю, узгадала знакаміты выраз беларускага класіка Францішка Багушэвіча: «...нават і трэба знаць суседскую мову, але найперш трэба знаць сваю». Тады спытала юных слухачоў аб іх любімым слове ў беларускай мове.
Адказы пачула такія:
– Буслік!
– Кветка!
– Вясёлка!
– Прыгожы!
Такім чынам, жыццё роднай мовы – вынік нашага выбару. Мы, сучасная моладзь, зробім усё, каб пранесці скрозь прызму часу гэту каштоўную скарбніцу і садзейнічаць яе развіццю.
